Dit is verbasend hoeveel spesies in die klein stukkie doringveld voorkom. Die afgelope 10 jaar het ek 121 voëlsoorte hier aangeteken.

Roofvoëls wat waargeneem is, is die bleeksingvalk, wat vermoedelik daar broei, die bruinjakkalsvoël en die kleinrooivalk, wat nie broeiende somerbesoekers is, en die blouvalk wat heeljaar hier vertoef.

Twee van die drie kakelaar soorte wat in Suidelike Afrika voorkom, broei hier. As jy mooi luister, behoort jy op 'n besoek aan die plaas die raserige voëlsoort te hoor. Die rooibekkakelaars met hul lang krom rooi bekke beweeg in groepe tussen die bome en maak gesamentlik 'n lekker lawaai deur te kekkel en te kwetter. Die swartbekkakelaars met soortgelyke, maar krommer swart bekke beweeg gewoonlik in pare of alleen deur die doringveld en maak 'n heel ander geluid wat 'n mens op 'n afstand kan hoor.

'n Hele paar van die laksmanfamilie is hier te sien. Die bekende fiskaallaksman en bokmakierie verg nie bespreking nie. Die rooiruglaksmanne besoek die gebied elke somer. Die mannetjie het 'n blougrys kop en 'n kastaiingbruin rug. Tydens 'n voëlkykuitstappie van Birdlife Vrystaat onlangs het ons die bontroklaksman ook hier gesien. Die voël lyk amper soos 'n bosbontrokkie, maar het 'n tipiese laksman snawel en sy roep klink soos 'n telefoon wat lui.

Die rooivlerkjagra word ook gereeld hier gesien. Hierdie laksman het 'n bruin kroon en rug, roesbruinvlerke en het 'n breë, wit wenkbroustreep en 'n swart streep deur die oog. Die voël het 'n indrukwekkende pronkvlug deur met 'n boog deur die lug te vlieg terwyl hy sy vlerke hard klap en daar geroep word.

Die bosveldtjiriktik wat in die soetdoringbome rondspring, se geluid "tjerik tik tik" behoort jy verseker te hoor. Die grys voëljie het 'n kastaiingbruin onderstert en het korporaalstrepies op sy vlerkies. Die akasiagrysmees, wat swart, grys en wit is, se helder roep "klee klee klee tjeree tjeree", behoort jou aandag te trek as jy gelukkig is om een van hulle in die nabyheid te hê. Die Kalahari wipstert is redelik algemeen in die omgewing en die naam is baie beskrywend, aangesien dit 'n sandbruin voëltjie met 'n rooibruin kruis en stert is.

Van al hierdie doringveldvoëls bly die klein saadvretertjies die mooiste - seker omdat hulle so ongelooflik kleurvol is. Dit is moeilik om hulle te sien, maar as jy gedul dig sit en wag by die stroompie wat deur die terrein vloei, sal hulle kom water drink. Dit is die gewone blousysie (poeierblou bors en gesig met vaalbruin agterkop en rug), koningblousysie (kastaiingbruin met violet wange en blou kruis), gewone melba (groen met karmosynrooi snawel, voorkop en keel), rooibekvuurvinkie (pienk met bruin rug en vlerkies en pienk snawel) en Jamesonse vuurvinkie (pienk met bruin rug en vlerkies, maar bekkie is blou en onderstert swart).

Pak jou verkyker en voëlgids in as jy Doornkloof gaan besoek - dit is die moeite werd.

Derick Labuschagne (Volksblad 25 Januarie 2006)